د.رشا درويش
ربنا ما خلق الأطفال عشان يكونوا رايقين هاديين فإذا أنت عايز طفل رايق وعادي أنت مضطر تحوله لطفل خائف خاضع أو تسرق طفولته وتحول لشخص ناضج في جسد صغير.. العناد المبادرة المغامرة الفضول الأسئلة الكثيرة رفض المقترحات وطلبات الوالدين كلها سلوكيات تناسب الطفل..
وعبر التربية الصحيحة الصحية نحن نساعد أطفالنا يستفيدوا من هذه الهدايا الربانية أو الأدوات ..
يتعلموا كيف يستخدموا عنادهم وكيف يتحول هذا العناد لقوة شخصية..
يتعلموا متى يبادروا وكيف تتحول هذه المبادرات إلى تعاون يتعلموا كيف يكون مغامرين وشجعان مع الحفاظ عليه سلامتهم..
أسئلتهم الكبيرة والكثيرة طريقة لجمع المعارف..
حيويتهم وحركتهم مهمة وأخطائهم المتكررة مساحة صناعة خبرة حياتية..
دورك كوالد تساعده يتطور ما تسلب منه قدراته المستقبلية ..
العناد يسهل التعامل معاه لو تعاملت انت من مرونتك القليلة وضغوط الحياة الكبيرة وحسنت من استجابتك ليها ..
وأدركت انه طفلك ما المكان المناسب لتفريغ احباطك وغضبك .. وتخلصت من صورة التربية القديمة الهدامة ..
تحويل طفلك لخاضع او متألم ما حيخلي والديتكم ناجحة .. حتكون معاناتكم ومعاناته معاكم بدون قيمة ..
ثلاثة خطوات بتحتاجوها ..
خطة واضحة للتربية عايزين اطفالكم يكبروا وهم شنو
اذا عايزنهم صادقين بتحتاجوا تزيدوا تسامحكم وانصاتكم
عايزنهم يتكلموا بهدوء محتاجين تتكلموا وتتعاملوا بلطف
عايزنهم ناجحين اكاديمياً محتاجين تدعموا صحة دماغهم بالتغذية المناسبة التحفيز النفسي و منحهم الأمان
..
الثانية محتاجين تعافي لنفوسكم من الغضب القديم والجديد وزيادة مرونتكم وصبركم اتخلصوا من أعبائهم عالجوا صدماتكم وأوجاعكم ابعدوا عن المحيط السلبي وزيدوا حولكم الناس اللطيفين المريحين في التعامل الواعيين ..
الثالثة .. اتعلموا عن التربية لانها ما بتنجح بالتخمين او اتباع سبل الأولين زي التعنيف التخويف و الاذلال ماعايز تتعلم من مختصين الكتاب الأعظم في ايدك طبق قواعد ربنا في التعاملات الانسانية المذكورة في القرآن مع طفلك
لا تعتدوا
لا تسخروا
لاتنابزوا
لا تهمزوا
لا تبخسوا
قولوا للناس حسنا
أمروهم بالصلاة و اصطبروا
ولما تقول لي انه السنة النبوية احلت الضرب حأقول ليك نص الحديث
مُروا أولادَكم بالصلاةِ وهم أبناءُ سبعِ سنين، واضرِبوهم عليها وهم أبناءُ عشرٍ، وفرِّقوا بينهم في المضاجع
من سبعة لعشرة ثلاثة سنوات انت تأمر وتعظ في كل صلاة لكل يوم يعني خمس صلوات لكل يوم لمدة ثلاثة سنوات
لو لم تأمر لمدة ثلاثة سنوات لكل صلاة لكل يوم لا يحق لك الضرب
وخليني ارضي ضميري امام الله واقول ليك
جملة اضربوهم عليها مختلفة عن اضربوهم
الضرب في اللغة له اكثر من معنى .. يختلف بإختلاف الحرف التابع
منها ضرب عليهم اي الزم او ضغط
ضربت عليهم الجزية
و ضرب بينهم بسور
اي فصل بينهم
و ضرب في الارض اي مضى او سعى
فنص الحديث دقيق وواضح
اضربوهم عليها اي افرضوها والزموهم بها
لكن اذا انت كوالد قررت تفهم النص كما يحلو لك وشهدت به على حقك في التعنيف فأقله التزم بالشرط وهو الدعوة بالحسنى
5475 مرة
لانه دا شرط استحقاق طفلك للضرب حسب فهمك ،،
وبعدها لازم تفهم انه الحديث مشروط للصلاة لا للتعاملات اليومية ..
الخلاصة ربي طفلك بما يرضي ربنا بدون ما تسلبه فطرته الأهداها ليه ربنا وطالما اخترت تنجب طفل فأعلم انه هذه طبيعته ..